Gugmang Di Kasuklian

Kung nahigugma ako kanimo
Wala ako'y ikapasigarbo
Kun dili nga gibiyaan ko ang tanan
Aron kanunay naa sa imong kiliran

Karong nahimamat ko ang pagka-ikaw
Tanan sa mata ko nahanaw'g napanaw
Sa sihag sa imong himaya
Salabotan ko nagpaubaya

Agaka ako sa paghigugma kanimo
Kay bisan sa paningkamot ko
Nihibalo ka sa akong kahuyang
Daw gugmang wa'y kaalam

Wala sa akong kusog ni sa kabaskug
Nga masuklian bisan man sa tingog
Ang kaayo ug gugma mo kanako
Nga ika-ikog kong ika-ako

Di matandi ang atong mga gugma
Kay para kanako gugma mo walay sama
Ug kung biyaan ko man ang tanan
Kini gihapon kulang, di masuklian

Gipildi mo ako sa imong pagbati
Ug king gugma ko akong isukli
Hinaot madawat bisan kabus ug makulang
Kay mao na ni ang akong tanan

Paghandum

Naghandum ko nga makab-ot ka
Apan mabuhat ko ang paghandum ra
Ang kamingaw misuksok sa 'kong kaunuran
Kalag ko mikurog sa bugnaw nga Amihan

Kamot ko mipaling-paling sa Habagatang hangin
Puslan ko'ng pangandoy sa akong kabahin
'ning gugma mipakab-ot diha kanimo
'ning kamot di makuptan imong anino

Gugma man mosurok sa akong mga ugat
Kung dili ma-ako ang sa akong tapat
Mahanaw ako sa akong pagdilaab
Maupos sa kalayo sa gugmang panaad

Pangandoy ug pangab-ot lang akong mahatag
Gikan sa tawo'ng way bahanding ikahatag
Kanunay'ng magdamgo nga ikaw ug ako
Mag-abot unta tungod sa paghandum kanimo

Pagpangga ug Pangilin

Kun sa kaugmaon ako mapanaw
Ug pangalan ko sa yuta mahanaw
Kanimo di ko kapugngan nga ihambog
Akong gugma nga wa'y isig-kaisog

Kahilimtan man sa kalibutan
'ning kinabuhi kong nahimungtan
Apan di ko tapigan ni tagu-an
K'ing halad ko nga tanan

Saksi ang mga adlaw sa akong paningkamot
Sa kasing-kasing nga di malimot
Ginapos sa gugma, kini nagtibok
Maabot lang ang mga panghinaut

Sa kangitngit ang bulan nahibalo
Sa mga pag-ampo ug pangamuyo
Nga kagabhi-on lang ang namati
Mga damdam nga wa'y pili

Gugma sa kahilum nag-alaab
Para sa hinigumang nahisalaag
Bisan sa silop ang awit magpabilin
Pagpangga ug pangilin